Hodrógeno
20 Urta 2021

Duro Felguerak, Hunosak eta Nortegasek Asturiasko meatze-arroetan hidrogeno berdearen inguruko proiektuak gauzatzeko hitzarmena sinatu dute

Duro Felguera,“eskurako” proiektuetan eta energiaren, meatzaritzaren, handling-aren eta oil & gas delakoaren arloetan espezializatutako zerbitzuetan espezialista den konpainia espainiarrak, hitzarmen bat sinatu du Hunosarekin eta Nortegasekin, Asturias erdigunean hidrogeno berdearen inguruko proiektuak gauzatzeko. Gas berriztagarri hori ekoiztean, biltegiratzean, garraiatzean, gas naturalaren sarean txertatzean eta mugikortasunaren arloan erabiltzean oinarrituko dira proiektu horiek.

Duro Felguerak eta Hunosak denbora daramate meatzaritza-lana amaitu izanagatik kaltetutako eskualdeen sare sozioekonomikoari bultzada emateko proiektuak itxuratzen. Era berean, energia zirkularrean oinarritutako energia-aukera eraginkorrak eskaini nahi dituzte, Trantsizio Ekologiko eta Erronka Demografikorako Ministerioak planteatutako Bidezko Trantsizio Estrategiaren ildotik. Hasierako premisa horiekin, funtsezkotzat jo zen energia hori sarean txertatzeko eta mugikortasunaren arloan erabiltzeko estaldura eskain zezaketen kideak gehitzea. Hala, NORTEGAS batu zitzaien, gas-sarearen kudeaketaren inguruan duen ezagutza eskaintzeko.

Hitzarmenaren lehenengo emaitza gisa, konpainiek hainbat proiektu aurkeztu dituzte Ministerioak abenduaren 19an aurkeztutako interes-adierazpenaren harira. Proiektu horiek ekoizpenari, biltegiratzeari, garraioari, gas naturalaren sarean txertatzeari eta mugikortasunaren arloan erabiltzeari buruzkoak dira, meatzaritza-eskualdeen eremuan, guztiak ere. Proiektu horietan kontuan hartu dira Nortegasen sarean txertatzeko punturik egokienak eta erabiltzaileek ekoiztu den hidrogenoa kontsumitzeko logistika, garraiorako zein erabilera industrialerako.

Ministerioak plazaratutako Hidrogenoaren Ibilbide-orrian aurreikusten den gas berriztagarri honen eskaeraren bilakaerara egokituko dira proiektuen garapena eta dimentsioa. Hidrogeno-kontsumitzaile askok, garraio-enpresek tartean, proiektu horien aldeko eta ekoiztutako hidrogenoa kontsumitzeko aukeraren aldeko interesa agertu dute jada.

Proiektuak garatu bitartean, bilerak egin dira intereseko hainbat talderekin, Oviedoko Unibertsitatearekin tartean. Hain zuzen ere, unibertsitatea funtsezkoa da, Ministerioak plazaratutako ibilbide-orrian esaten baita hidrogenoaren teknologiak unibertsitateko ikasketetan, erdi-mailako zein goi-mailako prestakuntza-zikloetan eta ikerketa-arloan aztertu behar direla. Horrela, batez ere lehenengo fasean instalatuko den proiektuak, irakaskuntzarekiko eta ikerketarekiko lotura izango du.

Horrez gain, proiektu horiek Hidrogenoaren Espainiako Elkartearen eta Hidrogenoaren Zentro Nazionalaren babesa dute. Azken hori erreferentziazko zentroa da ikerketa nazionalerako eta hidrogenoaren teknologien eta erregai-pilen inguruko ikerketa zientifiko eta teknologikoa bultzatzeaz arduratzen da.

Aurreko guztiaz gain, Duro Felguera, Hunosa eta Nortegas modu aktiboan lan egiten ari dira Asturiasko Hidrogeno Mahaian, hau da, Energiaren, Meatzeen eta Berraktibazioaren Zuzendaritzak eta Energiaren Asturiasko Fundazioak (FAEN) sortutako mahaian, eta eskualdea eraldatzeko bektore energetiko hau bultzatzearen aldeko konpromisoa agertu dute horrela.